Up Platt

In Platt schriev und proot ik. Hier sünd een paar Texten de ik maal schreven hebb. Disse Texten düren unnner de Angaav van de Quell brukt worden. Se sünd meest in Oostfreesk Platt upsett, ok wenn ik in Bielefeld upwussen bün. Trüürtexten, Prekens, Leder, Gedichten, Översetten van Theaterstücken un en Radiobidrag sünd Ergevnissen van mien algemeen Maken und Doon in un för disse Spraak. Well geern Platt lehren will, düürt mi geern anschrieven.

-------------------------
-------------------------

Youtube to bekieken sünd överigens
mien neejste Videos "Up Padd in Stadt".

-------------------------
-------------------------


Maal de Lü tofree laten

Schiller överall. Se seggen di, wat du maken düürst, sallst of kannst. Se vertellen di, wat dat Best för di is, waar du di bedragen sallst un wat du beter laten musst: Warben findst överall.


Mörgens an de Haltestee all, wenn di weer en angrint of utbrullt för Bliedskupp, umdat dat in de Laden an de Eck dicke teihn Perzent Rabatt up allens gifft.  As ik dat utsöken kunn, würr ik vörsichtig vörslaan, maal even een Jahr dat mit de Warben to laten. Maal utproberen. Wat meenen ji  wall, wat denn is? Wo upgerümt de Stadt denn utsücht!

Kien witteste Tanden, kien leckerste Appels un ok neet mehr de schoonste Kökens up grote Plakaten an d´Straat. Kien  lüstige Spröken, kein slecht Geweten un kien Fraulü, de de fettfreeste Wurst för hör Mannlü kopen, daarmit even disse optimeert daar Beroop un de Alldag lopen ... Melk maakt Mannlü moier ... fallt mi daar net in - of wo was de Spröök noch?

„Twee halen, man een betahlen“ – daar würr ik ja tolangen, tominst wenn dat um, alkoholfreije Dranken, Wiengummi un Riedbüxen gung. Sükse Büxen sünd düür un gau af, de bruukt een enfach dübbelt!!!

Kien Witz
„Kiek wat hebb wi weer lacht“ see ik dröög, as ik de sülvige Geschicht dat geföhlde dartigste Maal hören de. Irgendwat mit Eer, Water und wo disse to en goden Pries an well ok immer verköfft wurr. Wenn ik sien Verhaal neet all kennen dee, villicht harr ik würkelk laggtt. Humor, dat is natürrelk ok so een Saak. De een is blied wenn de anner van Stohl affallt, de anner bruukt dat wat deepsinniger.


Mitunner maakt de Situation de Humor ut, denn bruukt dat weer een menütenlangen Vertellsel um up de Keern van de Saak, de Pointe hentoföhren. Un de is dat geestrieke Enn van sowat. Een bruukt wall Humor, um de Spaaß an de Saak to verstahn.

Un de utert sük neet bloot in Laggen man is de Begaven van een Minsk Swierigheiden  und de Knappheiden van de Anner to överstahn, daaröver wegtosehen un disse mit Bliedskupp to nehmen. In een protestanske Aard, versteiht sük, neet mit Överdaad. Daarum is dat up sük humoorsk, en slechten Witz to verknusen.


Dat Övel lett sük mit Humor beter full holden. Un de ok de Düvel sitt in Detail, elke Lögen, Vertellsel of Witz leevt even van dat Utsmücken. Dör dat Vertellen, de Lengte, de Weerhalens un de Aard wo wat seggt is, laten widaarum ok dörschien up wat wie wachten: De Högdepunt, de Pointe, de Witz up sük, dat Laggen un dat Begriepen van dat Gesegde. Daarum, un dat is mien Privatmeenen, düürt een af un to ok en slechten Witz weerhalen un daarup luren, dat de Eenige de an ´t  Enn laggen deiht, de Verteller sülvst is.

Bloot to Foot

De Stadt beleevst best to Foot un daar wennst di an. Ik bün ja de heel radikale Footganger, wa. So van de Soort: Wenn d´r kien Bus is, denn loop ik genau een Haltestee wieder.  Ik harr irgendwaar maal leest, dat vandaag Minsken kien 500 Meter an´t Dag to Foot gahn. Dat is mi in mien alldag to minn.


Mien Schoh hebben vaker Locken als bi annern. Ehr dat se gröttere Gatten kriegen, gahn se naar de Schuster of direkt in Tünn. Afreven Stefels bruukt een irgendwenner ok neet mehr repareren, öko hen of her. Kött is Kött!

En Minsk hett ja verscheden Gangarten, nett as en Peerd. De lopen in´t Tree, sprengen Galopp of traben vör sük hen. De stuurste, see mien Riedmeester, is ja wall de enfache Tree. Recht hett he, man umdat he ok neet up Kopp fallen is, meen he ja heel wat anners daarmi, so in överdragen Bedüden. Wat meenen ji daarto?

Regendans

Dien Ogen , dien Laggen

dien feine Gesicht
Ik mach di bekieken

In dat warme Lücht
Ik seh di in´t Regen wenn
kien Sünnenschien is
 -De Dröppen fallen in dien Haar -
So natt, oh dien Oogen ,

dien Laagen, dien feine Gesicht


Ik will mit di danzen, di föhlen,
di ruken

do mi dien Hannen,

bit kein mörgen mehr is

dien Ogen, de lüchten so klaar

ik mach di raken

Töver
Wacht up mi

Is neet mehr lang

Övermörgen fangen wi

wat Neeis an

 

Daar is een Begünn

Wat Neeis

Een Töver


Waarup

hebben wi wacht

Un de Dag

De was so düster

So völ Stünden


To kold

Tööv up mi

Is neet mehr lang

Övermörgen fangen wi an


Copyright @ All Rights Reserved 2019